Is cúrsa ullmhúcháin páirtaimseartha é an cúrsa seo atá dírithe ar dhaoine a bhfuil suim acu tabhairt faoi scrúduithe Theastas Eorpach na Gaeilge. Cuideoidh an cúrsa seo le foghlaimeoirí a gcumas sa Ghaeilge a fhorbairt agus a fheabhsú, agus ullmhóidh sé foghlaimeoirí i dtreo scrúduithe TEG. Tá an cúrsa seo fóirsteanach do dhuine ar bith atá ag ullmhú do scrúduithe TEG ar chúiseanna gairmiúla chomh maith leo siúd ar spéis leo tabhairt faoi scrúduithe TEG ar mhaithe leis an gcáilíocht féin.
Tá sé d’aidhm ag an gcúrsa seo muinín, cumas agus scileanna teanga na bhfoghlaimeoirí a fhorbairt. Cuideoidh an cúrsa le foghlaimeoirí an Ghaeilge a úsáid go sóisialta chomh maith le hiad a ullmhú sa dóigh go n-éireoidh leo i scrúduithe TEG. Is féidir le foghlaimeoirí a thugann faoi scrúduithe TEG scrúdú cainte amháin a dhéanamh (Páirtchreidiúint) nó is féidir leo scrúdú iomlán a dhéanamh (Lánchreidiúint: cluastuiscint, léamhthuiscint, scríbhneoireacht agus scrúdú cainte). Díreoidh an cúrsa seo go príomha ar fhoghlaimeoirí a ullmhú don scrúdú cainte ach forbrófar na scileanna teanga ar fad a bheidh de dhíth chun tabhairt faoin scrúdú iomlán mar sin féin.
Is í an fhoghlaim chumaisc atá i gceist leis an gcúrsa seo:
Déanann na foghlaimeoirí tascanna ar bhonn rialta i rith an chúrsa seo agus faigheann siad aiseolas pearsanta ar gach píosa oibre a chuirtear isteach. Bíonn 9 bpíosa oibre i gceist (3 Léamhthuiscint; 3 Chluastuiscint; 3 Mhír Scríbhneoireachta) agus tá siad bunaithe ar na míreanna éagsúla a bhaineann le scrúduithe TEG. Cuidíonn an t-aiseolas seo go mór le foghlaimeoirí a ullmhú don scrúdú.
Clúdóidh an cúrsa seo na hábhair agus na topaicí ábhartha bunaithe ar shiollabais TEG chun foghlaimeoirí a ullmhú do na scrúduithe.
Baineann múinteoirí an Chúrsa Ullmhúcháin do Theastas Eorpach na Gaeilge (TEG) úsáid as cur chuige múinteoireachta cumarsáideach foghlaimeoirlárnach sa seomra ranga ar líne. Bíonn obair bheirte agus obair ghrúpa, gníomhaíochtaí rólghlactha agus cluichí teanga i gceist go leanúnach. Tugann an cur chuige seo deis do na foghlaimeoirí cleachtadh a dhéanamh ar an méid atá díreach múinte dóibh.
Meánleibhéal 1 (B1) Tá an leibhéal seo dírithe ar dhaoine a rinne staidéar ar an nGaeilge ar scoil, b’fhéidir roinnt mhaith blianta ó shin, a thuigeann go leor den teanga ach nach raibh mórán deiseanna acu ar í a úsáid le blianta beaga anuas. Múintear nithe bunúsacha ag tús an chúrsa ach leanann an rang ar aghaidh níos tapa ansin ná mar a dhéanfadh rang ag leibhéal níos ísle. Bíonn an bhéim ar fhorbairt scileanna labhartha agus éisteachta ach bíonn deiseanna ag na foghlaimeoirí an teanga a scríobh agus a léamh ó am go chéile freisin. Múintear an ghramadach i gcomhthéacs, de réir mar a bhíonn sí ag teastáil.
Meánleibhéal 2 (B2) Feiliúnach do dhaoine atá breá ábalta comhrá a dhéanamh trí Ghaeilge agus a úsáideann í ó am go chéile – go sóisialta, mar shampla. Bíonn seans ag na rannpháirithe cur lena stór focal agus lena n-eolas ar ghramadach na teanga. Déantar plé ar thopaicí níos casta ná na cinn a bhíonn i gceist i Meánrang 1 agus bíonn níos mó béime ar an léitheoireacht ná mar a bhíonn sa leibhéal níos ísle sin.
Tá siollabais chuimsitheacha forbartha ag Gaelchultúr agus leantar na siollabais seo i ngach rang ag gach leibhéal.
Baineann cuid múinteoirí Ghaelchultúir úsáid as an gcur chuige cumarsáideach, rud a chiallaíonn go mbíonn deis ag na foghlaimeoirí páirt ghníomhach a ghlacadh i ngach rang.
Bíonn obair bheirte agus obair ghrúpa i gceist go leanúnach, mar sin bíonn seans ag na foghlaimeoirí cleachtadh a dhéanamh ar an méid a mhúintear dóibh. Bíonn an bhéim ar labhairt na teanga agus ar an éisteacht den chuid is mó (ach amháin sa rang cruinnis), ach tugtar deis do na foghlaimeoirí an teanga a léamh agus a scríobh ó am go chéile chomh maith.
Foghlaim níos mó fúinn
Is suíomh gréasáin ríomhfhoghlama é Ranganna.com a chuirfidh ar do chumas Gaeilge nádúrtha a fhoghlaim go neamhspleách. I mbeagán focal, is é an áit is fearr chun Gaeilge a fhoghlaim ar líne.
Bain triail as saor in aisce
