Eolas Fúinn

Darren Ó Rodaigh

Rugadh agus tógadh Darren i gCill Mhantáin. Rinne sé a bhunchéim le Fiontar in OCBÁC agus MBA i gColáiste na Tríonóide. Thosaigh sé a chéad chomhlacht san ollscoil agus d’éirigh leis an gcomhlacht sin dul ar an stocmhalartán. Bhí baint aige le neart comhlachtaí nuabhunaithe thar na blianta agus bhunaigh sé Gaelchultúr in 2004. Is maith leis a bheith ag rith agus ag cócaireacht agus tá spéis aige i gcúrsaí reatha.

Eimear Ní Chinnéide

Is as Contae Ard Mhacha ó dhúchas í Eimear. Rinne sí bunchéim sa Ghaeilge agus sa Fhraincis in Ollscoil na Banríona, Béal Feirste agus bhain sí céadonóracha amach sa dá ábhar sin. Rinne sí máistreacht agus dochtúireacht sa Ghaeilge san institiúid chéanna agus bhain sí an chéim dochtúra amach sa bhliain 2017. Bronnadh scoláireacht Fulbright uirthi sa bhliain 2016 agus chaith sí bliain ag teagasc na Gaeilge in Ollscoil Nua-Eabhrac agus in Ollscoil Drew, New Jersey. Thosaigh Eimear ag obair le Gaelchultúr in 2019 agus is í Leas-Stiúrthóir Oideachais an choláiste ó bhí 2021 ann. Tá dúil mhór aici sa cheol, sa léitheoireacht agus a bheith ag amharc ar Netflix. Is breá léi dul ag taisteal thar lear chomh maith.

Ellen Curtin

Rugadh agus tógadh Ellen i mBaile Átha Cliath. Bhain sí céadonóracha amach sa bhunchéim Gaeilge agus Iriseoireacht ag Ollscoil Chathair Bhaile Átha Cliath agus san iarchéim Tráchtálú Teicneolaíochta ag Ollscoil na Gaillimhe. Tá taithí ríluachmhar faighte aici ar chúrsaí brandála, ar chruthú ábhair agus ar an margaíocht dhigiteach le comhlachtaí in earnáil na Gaeilge agus in earnáil na turasóireachta. Taitníonn sé léi a bheith ag taisteal, ag péinteáil agus ag snámh san fharraige. Thosaigh sí ag obair le Gaelchultúr in 2020.

Pádraig Mac Congáil

Rugadh agus tógadh Pádraig Mac Congáil i nDoire Cholmcille. D’fhreastail sé ar Ollscoil na Banríona, Béal Feirste, áit ar bhain sé BA, MA, PhD agus Teastais Iarchéime san Oideachas amach. Scríobh sé a thráchtas PhD ar ‘Éamon de Valera, an Ghaeilge agus an Náisiúnachas Teanga’, sular chaith sé bliain ar scoláireacht Fulbright ag teagasc Gaeilge sna Stáit Aontaithe. Tá Pádraig paiseanta faoi chur chun cinn na Gaeilge san iarthuaisceart agus chaith sé trí bliana ag obair le pobail Ghaeilge sa taobh sin tíre sular thosaigh sé ag obair le Gaelchultúr in 2022.

Sharon Howe

Is as Ros Goill i dTuaisceart Thír Chonaill í Sharon. Bhain sí céim amach sa Ghaeilge, sa Ghearmáinis agus sa Bhéarla ó Choláiste na hOllscoile, Baile Átha Cliath, sa bhliain 2020. Chaith Sharon cúpla samhradh ag obair sa Ghearmáin chun a cuid Gearmáinise a fheabhsú nuair a bhí sí ina mac léinn. Tá staidéar déanta aici ar an Spáinnis agus ar an Phortaingéilis mar ábhair roghnacha agus í ar an ollscoil fosta. Bíonn sí ag snámh san fharraige achan lá agus is breá léi spóirt uisce – go háirithe an tonnmharcaíocht. Thosaigh Sharon ag obair ar bhonn páirtaimseartha leis an choláiste sa bhliain 2018 agus í ar an ollscoil i mBaile Átha Cliath agus thosaigh sí ag obair go lánaimseartha i mí an Mheithimh 2022.

Niamh Nic Leoid

Is as Leitir Mealláin i nGaeltacht Chonamara í Niamh. Bhain sí BA sna Teangacha Feidhmeacha (Gaeilge, Fraincis & TESOL) amach ó Ollscoil Luimnigh agus MA san Aistriúchán (Gaeilge & Fraincis) ó Choláiste na hOllscoile, Corcaigh. Bronnadh PhD sa Léann Ceilteach uirthi i 2023 ó Ollscoil Dhún Éideann. Tá suim ar leith aici sa sealbhú teanga agus i sochtheangeolaíocht na Gaeilge. Tá tréimhsí caite ag Niamh ag teagasc na Gaeilge in Éirinn, in Albain agus i Meiriceá (Scoláireacht Fulbright 2016). Thosaigh sí ag teagasc le Gaelchultúr i 2020 agus tá sí ag obair ina ról mar Cheann Forbartha Cúrsaí ó 2022. Is breá le Niamh a bheith ag cócaráil agus ag ithe, ag siúl sléibhe agus ag taisteal.

Jody Buckley-Coogan

Ó Chorcaigh do Jody, áit ar bhain sé BA sa Ghaeilge agus sa Fhraincis agus MA sa tSean-Ghaeilge agus sa Mheán-Ghaeilge amach i gColáiste na hOllscoile, Corcaigh. Ghnóthaigh sé PhD ó Ollscoil na Banríona, Béal Feirste in 2020 do thráchtas a scríobh sé dar teideal Dlíthe Luath-Ghaeilge: Staidéar ar Theanga agus ar Dhátú Gluaiseanna agus Tráchtanna. Tar éis dó sealanna a chaitheamh ag obair laistigh agus lasmuigh de shaol na Gaeilge, thosaigh sé i bpost le Gaelchultúr ag tús 2024.

Dominica Williams

Is as Baile Átha Cliath í Dominica. Tógadh le Gaeilge í i dteaghlach dátheangach agus d’fhreastail sí ar Ghaelscoileanna i ndeisceart Bhaile Átha Cliath. Bhain sí céim amach sa Drámaíocht agus sa Ghearmáinis i gColáiste na Tríonóide agus, ina dhiaidh sin, d’oibrigh sí mar amhránaí opera ar feadh deich mbliana leis na compántais Éireannacha Irish National Opera agus Wexford Festival Opera chomh maith leis na compántais Shasanacha Glyndebourne Festival Opera agus Opera Holland Park. Thosaigh sí ag múineadh na Gaeilge ceithre bliana ó shin agus is múinteoir Gaeilge í le Gaelchultúr anois chomh maith. Tá an-spéis ag Dominica sna teangacha, san amharclannaíocht, san opera agus san ealaín agus is aoibhinn léi a bheith ag snámh san fharraige agus ag bollánóireacht faoi dhíon.

Clíodhna Ní Chorráin

Is as Contae Ard Mhacha ó dhúchas do Chlíodhna, ach mar gheall ar an dúil atá aici sa taisteal, is minic a bhíonn sí lonnaithe in áiteanna éagsúla timpeall an domhain. Chaith sí bliain ag cur fúithi sa Spáinn in 2017 agus í ag teagasc Béarla ann, agus bhain sí céim chéadonóracha amach sa Ghaeilge agus sa Spáinnis ó Ollscoil na Banríona, Béal Feirste sa bhliain 2019. Chaith Clíodhna cúpla bliain ag obair in earnáil na teilifíse Gaeilge, sular bhog sí chuig na Stáit Aontaithe chun bliain a chaitheamh ag teagasc Gaeilge ar scoláireacht Fulbright in Ollscoil Notre Dame. Agus fonn bóthair go fóill uirthi, shocraigh Clíodhna fanacht i Meiriceá Thuaidh i ndiaidh di scoláireacht eile a fháil (ICUF) leis an Ghaeilge a theagasc in Ollscoil Ottawa i gCeanada. Tá suim ag Clíodhna i bhfoghlaim teangacha agus i gceol traidisiúnta na hÉireann. Is breá léi dul go bialanna nua, agus go siopaí earraí athláimhe. Thosaigh sí ag obair le Gaelchultúr in 2024.

Éamonn Ó Dónaill

Carmel Nic Eoin, Dónall Ó Baoill, Fionnbarra Ó Brolcháin, Muireann Ní Mhóráin