Sé Leid le do Spriocanna Teanga don Athbhliain a bhaint amach

Tá tús na bliana úire linn anois agus táimid uilig ag tabhairt faoi rún na hAthbhliana, cad é atá ar intinn agat? Seans gur mhaith leat cuairt a thabhairt ar thír nua nó post nua a fháil? Nó dá mba mhaith leat teanga nua a fhoghlaim san athbhliain, tá lear mór leideanna againn chun tacú leat do spriocanna teanga a bhaint amach.

1. Luigh isteach ar an teanga

Is cuma más ag foghlaim na Gaeilge nó na Gearmáinise atá tú, más mian leat teanga ar bith a fhoghlaim is gá duit an teanga sin a fhí isteach i ngach gné de do shaol. Mar shampla, más mian leat snas a chur ar do chuid Gaeilge san athbhliain, ní mór duit a bheith ag éisteacht le Raidió na Gaeltachta nó Raidió na Life agus ag féachaint ar TG4 chun Gaeilge shaibhir a shealbhú.

Tá go leor siamsaíochta ar fáil trí na meáin shóisialta Ghaeilge chomh maith. Bí cinnte go leanann tú @bloc_tg4, @miseciara agus @muinteoirmeg ar na meáin shóisialta le craic agus ceachtanna Gaeilge a chur le d'fhotha.

2. Bain Leas as Áiseanna Teanga ar Líne

Tá go leor acmhainní iontacha ar fáil ar líne dóibh siúd ar mhaith leo a gcuid Gaeilge a fheabhsú. Más mian leat snas a chur ar do chuid Gaeilge san athbhliain, molaimid leas a bhaint as focloir.ie agus teanglann.ie le stór focal nua a fhoghlaim. Tá comhaid fuaime ar fáil ar an dá shuíomh sin chomh maith a bheidh ina gcuidiú mór agat chun fuaimniú na teanga a fheabhsú.

3. Cláraigh do Rang Idirghníomhach

Tá go leor áiseanna ar fáil d’fhoghlaimeoirí teanga na laethanta seo tríd an bhfoghlaim fhéinstiúrtha. Cé go bhféadann na háiseanna seo a bheith an-úsáideach chun scileanna teanga an fhoghlaimeora a fheabhsú, áfach, is fearr go mór páirt a ghlacadh i ranganna beo teanga a bhíonn á múineadh ag saineolaithe teanga.

Tá réimse leathan cúrsaí teanga á dtairiscint ag Gaelchultúr, idir chúrsaí Gaeilge ar líne agus cúrsaí Gaeilge ar an láthair, agus múinteoirí den scoth ina mbun. Más mian leat an Ghaeilge a fhoghlaim san athbhliain bí cinnte go gcaitheann tú súil ar chúrsaí Gaeilge Ghaelchultúir agus foghlaim an Ghaeilge leis an Scoil Teanga is fearr in Éirinn.

4. Tabhair Cuairt ar Chainteoirí Dúchais

Ní bheidh tuiscint iomlán agat ar aon teanga mura bhfuil tuiscint agat ar an gcultúr agus ar an bpobal lena mbaineann sí. Chun lántairbhe a bhaint as do thuras teanga, molaimid am a chaitheamh ag bualadh le cainteoirí dúchais agus páirt a ghlacadh i gcuid dá dtraidisiúin fiú. Má tá suim agat Gaeilge a fhoghlaim san athbhliain, ná déan dearmad nach gá duit taisteal siar go Conamara le tú féin a bhá i bpobal na Gaeilge – is féidir bualadh le Gaeilgeoirí i ngach cearn den tír. Coinnigh súil ar na himeachtaí Gaeilge ar siúl i do cheantar féin agus glac páirt iontu le tuiscint níos doimhne a fháil ar an teanga uathúil seo.

5. Cleachtadh, Cleachtadh, Cleachtadh

‘Beatha teanga í a labhairt,’ de réir an tseanfhocail, agus níl bealach ar bith níos fearr le teanga a fhoghlaim ná í a húsáid. Más mian leat tuiscint nádúrtha a bheith agat ar an nGaeilge, molaimid duit í a labhairt chomh minic agus is féidir. Iarr ar dhuine de do chuid cairde nó de do theaghlach í a chleachtadh leat nó glac páirt i gciorcal comhrá le foghlaimeoirí eile de do leithéidse.

Ar nós scil ar bith eile, ní éireoidh leat teanga nua a fhoghlaim gan í a chleachtadh. Ná déan dearmad gur féidir leat do chuid scileanna labhartha a chleachtadh agus tú leat féin chomh maith. Labhair í amach os ard agus tú leat féin. Éist léi ar an raidió nó ar phodchraoltaí, breac síos focail nua a chloiseann tú agus déan iarracht iad a fhuaimniú os ard ar do chaoithiúlacht. Más mian leat an Ghaeilge a fhoghlaim san athbhliain bí cinnte leas a bhaint as an lear mór ceachtanna idirghníomhacha atá ar fáil ar an suíomh ríomhfhoghlama Gaeilge Ranganna.com. Is féidir leat triail a bhaint as na cláir seo saor in aisce trí chliceáil ar an nasc seo.

6. Bain Sult Aisti

Mar fhocal scoir, tá sé tábhachtach a thuiscint gur dúshlán mór é teanga nua a fhoghlaim. Is de réir a chéile agus le himeacht ama a fhoghlaimítear teanga; mar sin, ná caill misneach má thógann sé níos mó ama ort dul i ngleic léi ná mar a cheap tú a bheadh i gceist. Déanfaidh tú botúin, mar is dual do gach duine, ach foghlaimeoidh tú rud éigin nua gach uair a dhéanfaidh tú botún. Bí foighneach leat féin agus ná caill an fonn a spreag tú chun an teanga a fhoghlaim ar an gcéad dul síos.