Léigh agus Pléigh: Comhrá le hEithne Ní Ghallchobhair

Léigh agus Pléigh: Comhrá le hEithne Ní Ghallchobhair
Léirigh spéis
Seisiún amháin
7.00pm-8.00pm
Ardleibhéal
Ar líne
Déan do chuid Gaeilge a thástáil

Faigh amach cén leibhéal is oiriúnaí duitse.

Cuir tús leis an tástáil

Cur síos

Ar bhain tú taitneamh as an gcnuasach Caithréim agus Tóir, leabhar mhí Feabhra de ClubLeabhar.com, agus ar mhaith leat níos mó a fhoghlaim faoin spreagadh taobh thiar de? Beidh muid ag teacht le chéile ar líne leis an scéalaí agus file Eithne Ní Ghallchobhair ar an 20 Márta ag 7pm chun léargas uathúil a fháil ar a saothar agus beidh deis agatsa géarcheist ar bith atá agat maidir leis an gcnuasach seo a chur uirthi.

Saothar fileata scéalaíochta is ea é Caithréim agus Tóir a thugann léiriú comhaimseartha dúinn ar chuid de na scéalta is mó le rá ón bhFiannaíocht. Is é an tríú heagrán de thriológ é a thagann sna sála ar Múscail, a Ghiorria agus An Craiceann agus a Luach, mar sin, beidh neart le plé ar an oíche.

Ná bí buartha mura bhfuil an cnuasach léite go fóill agat, deis iontach a bheidh anseo chun blaiseadh a fháil de agus aithne níos fearr a chur ar an údar. Cuirfidh duine ar bith a bhfuil spéis acu i gcúrsaí béaloidis agus in oidhreacht na hÉireann spéis sa saothar seo, agus iad siúd ar mhaith leo saibhreas teanga a bhaint amach freisin (go háirithe nathanna ó Chanúint Uladh).

Bígí linn agus cláraigh anseo inniu chun do spás a dheimhniú.

Is féidir cóip den leabhar a fháil anseo.

Faoin údar

Is as iardheisceart Thír Chonaill í Eithne Ní Ghallchobhair. Tá sí ina scríbhneoir agus ina scéalaí agus tá duaiseanna Oireachtais agus eile buaite aici sa dá cheird. Tá cúig leabhar foilsithe aici: Anathomia Gydo (2004), Súil (2018), Múscail, a Ghiorria (2020), An Craiceann agus a Luach (2021) agus Caithréim agus Tóir (2024). Tá gearrscéalta léi foilsithe in Irish Pages agus Comhar. Tá an-dúil ag Eithne i seanlitríocht na Gaeilge agus sa bhéaloideas ach go háirithe. Glacann sí páirt in imeachtaí scéalaíochta fud fad na hEorpa.

Faoi Clubleabhar.com

Tá sé mar aidhm ag ClubLeabhar.com léitheoirí in Éirinn agus thar lear a spreagadh agus a thabhairt le chéile chun leabhair a léamh agus a phlé. Roghnaítear leabhar nua gach mí le léamh agus spreagtar baill an chlub le plé a dhéanamh ar na leabhair sin. Cuireann ClubLeabhar.com sleachta agus gluaiseanna ar fáil le gach leabhar le tacú le léitheoirí agus eisítear podchraoladh nua gach mí ina ndéanann aoichainteoirí plé ar leabhar na míosa sin. Is tionscadal de chuid Ghaelchultúir é ClubLeabhar.com atá maoinithe ag Foras na Gaeilge.

Is féidir ballraíocht a ghlacadh anseo le fanacht ar an eolas faoi imeachtaí an chlub.

Éist leis an bplé a rinneadh faoi Caithréim agus Tóir anseo.

Ár gcur chuige múinteoireachta

Tá siollabais chuimsitheacha forbartha ag Gaelchultúr agus leantar na siollabais seo i ngach rang ag gach leibhéal.

Baineann cuid múinteoirí Ghaelchultúir úsáid as an gcur chuige cumarsáideach, rud a chiallaíonn go mbíonn deis ag na foghlaimeoirí páirt ghníomhach a ghlacadh i ngach rang.

Bíonn obair bheirte agus obair ghrúpa i gceist go leanúnach, mar sin bíonn seans ag na foghlaimeoirí cleachtadh a dhéanamh ar an méid a mhúintear dóibh. Bíonn an bhéim ar labhairt na teanga agus ar an éisteacht den chuid is mó (ach amháin sa rang cruinnis), ach tugtar deis do na foghlaimeoirí an teanga a léamh agus a scríobh ó am go chéile chomh maith.

Foghlaim níos mó fúinn

Ceisteanna Coitianta

Beidh ríomhaire glúine nó deisce le ceamara agus micreafón air de dhíth ort.
Cuirfear nasc Zoom chugat sa ríomhphost roimh thús an chúrsa. Beidh an nasc sin le húsáid agat le logáil isteach ar an rang gach seachtain.
Is féidir ach ní bheidh tú in ann páirt a ghlacadh in obair bheirte ná obair ghrúpa. B’fhearr ríomhaire deisce nó glúine a úsáid, mar sin.
Molaimid do na rannpháirtithe a gceamara a chur ar siúl le linn na ranganna de bhrí go gcuireann sé sin le hatmaisféar an ranga. Mura dteastaíonn uaitse do cheamara a chur ar siúl, áfach, ní gá duit é sin a dhéanamh.
Beidh ar a laghad seisear foghlaimeoirí eile sa rang agus ocht nduine dhéag ar a mhéad.
Beidh obair bheirte agus obair ghrúpa mar chuid lárnach de gach rang, mar sin beidh neart deiseanna labhartha agat. Beidh deis agat lámh fhíorúil a chur in airde agus ceisteanna a chur ar an múinteoir ó bhéal am ar bith is mian.
Ní bheidh. Seolfar leabhrán digiteach chugat roimh thús an chúrsa agus beidh tú ábalta an t-ábhar sin a úsáid le linn na ranganna agus chun staidéar a dhéanamh ó sheachtain go seachtain. Tá costas an leabhráin seo san áireamh i dtáille an chúrsa. Beidh fáil agat ar na nótaí ar fad ar líne freisin.

Téarmaí agus Coinníollacha

  • Is féidir táille cúrsa a aisíoc ina hiomláine le foghlaimeoir suas go cúig lá oibre roimh thús an chúrsa. Is gá teagmháil a dhéanamh le foireann Ghaelchultúir ar an ríomhphost nó ar an nguthán agus an aisíocaíocht sin a iarraidh. (Tá ár gcuid sonraí teagmhála ar fáil anseo.)
  • Má shocraíonn an mac léinn i ndiaidh an chéad ranga gur mhaith leis/léi éirí as an gcúrsa, aisíocfar 60% den táille iomlán leis/léi. Ina dhiaidh sin, ní thabharfar aon aisíocaíocht don mhac léinn.
  • Tá sé de cheart ag Gaelchultúr Teoranta rang a chur ar ceal nó ranganna a chur le chéile.
  • IMás gá cúrsa a chur ar ceal, déanfar gach iarracht na rannpháirtithe a chur i rang eile nó a chlárú ar chúrsa ar líne. Tabharfar aisíocaíocht iomlán don chustaiméir mura bhfeileann na roghanna sin dó/di.
  • Ní féidir le mac léinn a c(h)lárúchán a chur siar ach uair amháin. Más mian leis/léi an clárúchán a chur siar, is gá é sin a chur in iúl d’fhoireann Ghaelchultúr faoi sheachtain a trí den chúrsa. Ní thabharfar aon aisíocaíocht don mhac léinn mura nglacann sé/sí le háit ar an gcéad chúrsa eile a bhfuil sé/sí in ainm is freastal air.
  • Má chláraíonn mac léinn ar an leibhéal mícheart, ní ghlacfaidh Gaelchultúr le freagracht ar bith maidir leis sin. Molaimid dár mic léinn ar fad tabhairt faoin triail Ghaeilge ar líne nó comhairle a lorg uainn le cinntiú go bhfuil siad ag tabhairt faoin leibhéal ceart.
  • Má tá mac léinn ag iarraidh bogadh go leibhéal eile, ní féidir gealltanas a thabhairt go mbeidh spás ar fáil dó/di sa leibhéal sin. Má bhíonn spás ar fáil, gearrfaidh Gaelchultúr €10 le híoc as an gcostas riaracháin a bhainfidh leis an aistriú. Ní féidir aistriú go leibhéal eile ach i ndiaidh an chéad ranga amháin.
  • Is gá táille iomlán an chúrsa a íoc roimh thús an chúrsa. Ní féidir freastal ar an gcúrsa mura bhfuil an táille iomlán íoctha.
  • Caithfidh gach foghlaimeoir cloí lenár gCód Iompair agus iad ag freastal ar chúrsa linn.
  • Níl cead ag daoine faoi 18 bliain d’aois freastal ach ar chúrsaí áirithe, atá sainscríofa agus curtha in oiriúint do dhaoine faoi 18 bliain d’aois. Tá ár Ráiteas um Chosaint Leanaí le fáil anseo.

B’fhéidir go mbeadh suim agat sna cúrsaí seo a leanas

Caith súil ar na cúrsaí go léir