Moltaí leabhar – Liosta léitheoireachta an tSamhraidh
Agus an samhradh linn, is maith an t-am é a bheith sáite i scéal maith agus tú i do luí le taobh na linne snámha nó ar an trá. Bíodh tú i do dhuine mór uafáis, i do rómánsaí cruthanta, nó i do bhleachtaire cois teallaigh, seo duit 5 mholadh léitheoireachta le tú a chur ag léamh trí mheán na Gaeilge an Samhradh seo.
Is é scéal Éadaoine scéal mór grá na Sean-Ghaeilge, scéal nár mhair ach ina bhlúirí i Leabhar na hUidhre agus i Leabhar Buí Leacáin. Tá na blúirí sin ar fad fite in aon scéal amháin ag Diarmuid Johnson — na bearnaí líonta, agus feoil curtha ar na cnámha —ionas gur sean-eipic nua atá againn atá inchurtha le scéal Héilin na Traí, nó le scéal Tristan agus Íosóid.
Bean de shliocht éanlaith an tsí í Éadaoin. Í seal i measc na neamhbhuan abhus, seal i measc na mbuan i mBrí Léith. Ba í Éadaoin bean chéile Eochaidh, Rí na Teamhrach, ach ba do Mhidhir a thug sí grá a croí – do Mhidhir an tsí, Midhir Bhrí Léith, Midhir na háille agus na mbriathra meala.
Fágtar Thanielle, an bhean i mBiarritz, ina haonar i mbun bialainne nuair a fhaigheann an t-úinéir, Mario, bás i dtimpiste bhóthair. Tá an saol ag breith an-dian uirthi. Ba é Mario athair a cuid leanaí ach bhí saol eile faoi cheilt aige freisin. Téann Thanielle ar thóir a hathar féin, Sasanach a chaith deireadh seachtaine rugbaí in Biarritz na blianta ó shin. Déanann sí iarracht teacht air i Manchain Shasana. Tá saol casta coiriúil á chaitheamh aige ansin agus níl tuairim dá laghad aige go bhfuil iníon aige in Biarritz. Leanann an scéal ar aghaidh trí chuardach, tóraíocht, cearrbhachas, dúnmharú agus – cá bhfios – fuascailt, b’fhéidir!
Mar a bheadh brionglóid ann – nó tromluí fiú – is leabhar diamhair urchóideach é An Cúigiú Díochlaonadh ar go leor slite. Mar sin féin, beidh tú faoi gheasa aige ó thús go deireadh mar gheall ar an ngreann craiceáilte san úrscéal dothuartha spleodrach seo… Dúnmharú, catmharú, agus níos measa arís, ‘bailiúchán focal’ á ghoid…!
Aistriúchán Gaeilge den úrscéal cáiliúil Life of Pi is ea é seo. Insítear scéal faoi bhuachaill óg Indiach ar tharla longbhriseadh dó agus atá ar strae ar muir anois i mbád mór tarrthála. Tá ceithre ainmhí fhiáine mar chomrádaithe aige: órang-útan, séabra, hiéana, agus go háirithe, Richard Parker, tíogar de chuid Bheangál.
Is síceolaí í Cass Ó Caoimh a bhogann go Conamara nuair a fhágtar ina baintreach í. Mar aon leis an bpostroinnt atá aici san ionad leighis áitiúil, glacann sí le post páirtaimseartha i gCeannáras na nGardaí mar shíceolaí fóiréinseach. Nuair a bháitear Niamh, cara a hiníne, creideann Cass gur dúnmharaíodh an ógbhean in ainneoin an mhéid a cheapann an Bleachtaire Cigire Tom Breasal (a bhí mar leannán aici tráth, mar a tharlaíonn sé). Le cúnamh ón iriseoir Gearóid, mac Tom, agus ó dhaoine a gcuireann sí aithne orthu, déanann sí bás Niamh a fhiosrú agus tugann sí scéal scáfar chun solais.
Céard a cheapann tú faoi na moltaí seo? Tá gach ceann de na leabhair seo ar díol ar Siopa.ie, nó más mian leat tuilleadh moltaí a fháil, bí i do bhall de ClubLeabhar.com agus féach céard a cheap léitheoirí eile inár bhfóraim ar líne nó mar a pléadh sna podchraoltaí!
