Tá sé mar mhisean ag Gaelchultúr, an t-aon choláiste tríú leibhéal a fheidhmíonn go hiomlán trí mheán na Gaeilge, an Ghaeilge a chur chun cinn mar theanga bheo sa ghnáthshaol laethúil, san earnáil acadúil agus i saol an ghnó agus na fiontraíochta. Chuige sin, tá lúcháir ar an gcoláiste Dioplóma Gairmiúil úrnua dar teideal Fiontair Bheo - Straitéis, Cuspóir agus Ceannaireachta sheoladh san fhómhar.

Mairfidh an cúrsa seo 12 sheachtain agus é mar fhreagairt radacach ar dhúshláin eacnamaíochta agus chomhshaoil. Is é an Dr Fionnbarra Ó Brolcháin, údar agus ollamh, a dhear an cúrsa agus a chuirfidh an clár i láthair. Tá taithí na mblianta ag an Dr Ó Brolcháin cúrsaí ceannródaíocha fiontraíochta a chur ar fáil in ollscoileanna ar fud an domhain, an Coláiste Ollscoile, Baile Átha Cliath, Coláiste na Tríonóide, Ollscoil Mhá Nuad agus University of Michigan ina measc. Seo é an chéad uair riamh dó a leithéid de Dhioplóma Gairmiúil a chur i láthair trí mheán na Gaeilge.

Ón taithí atá ag an Dr Ó Brolcháin ar a bheith ag plé le fionraithe agus smaointeoirí cruthaitheacha atá le feiceáil go fairsing i saol na Gaeilge, tá sé cinnte go meallfaidh an cúrsa seo daoine a imreoidh dea-thionchar ar gheilleagar agus comhshaol na tíre agus daoine a bheidh freagrach as fiontair agus tionscnaimh ghlasa a fhorbairt agus a spreagadh i dtodhchaí na tíre.

“Is aitheantas é seo ar an dianiarracht a dhéantar i measc phobal na Gaeilge chun an tsochaí a fheabhsú agus cuirfear eispéireas tarraingteach foghlama ar fáil dóibh siúd atá i mbun cinnteoireachta agus poist cheannródaíocha in eagraíochtaí poiblí agus príobháideacha araon”, a deir Dr Ó Brolcháin, stiúrthóir an chúrsa, “Ina theannta sin, cruthófar timpeallacht foghlama spreagúil d’fhiontraithe, d’fhiontraithe ionchasacha agus d’úinéirí gnó atá dírithe ar fhiontair ghlasa a bhunú agus a fhorbairt in Éirinn, a bhfuil cuspóir daingean acu”

Beidh an féinmhachnamh mar chuid lárnach den chúrsa agus tá luach faoi leith ag baint leis an ngné seo den fhoghlaim, dar leis an Dr Ó Brolcháin:

“Tá an cúrsa atá againne an-difriúil leis an ngnáthchur chuige a úsáidtear i gcláir oideachais do dhaoine fásta. Gné shainiúil is ea é go gcabhraíonn an cúrsa le daoine tuiscint níos doimhne a fháil orthu féin chun saol a bhfuil brí níos doimhne leis a chaitheamh agus tionchar dearfach a imirt ar an bpláinéad”.

Beidh an cúrsa seo á reáchtáil i gcomhar le Gaelchultúr agus is é seo an chéad uair ó bunaíodh an coláiste in 2004 a bheidh cúrsa á thairiscint ag an gcoláiste nach ndíríonn go sainiúil ar fhoghlaim na Gaeilge. Is é Fiontair Bheo - Straitéis, Cuspóir agus Ceannaireacht an chéad Dioplóma Gairmiúil a chuirfidh an coláiste ar fáil.

Is cúis mhór bhróid é don choláiste go ndéanfar freastal ar chainteoirí na teanga trí chúrsa ábhartha, ceannródaíoch mar seo a chur ar fáil a chuirfidh an Ghaeilge ar comhchéim le teanga ar bith eile atá lárnach in earnáil an oideachais agus i saol na heacnamaíochta agus cuirfidh sé an Ghaeilge i gcroílár an dearcaidh ghlais atá ag teacht chun cinn ar fud an domhain.

“Níor cheart caitheamh leis an nGaeilge mar ábhar staidéir amháin”, a deir Niamh Ní Chadhla, Príomh-Oifigeach Feidhmiúcháin an choláiste. “Sa chúrsa seo, is féidir le daoine proifisiúnta ó gach cúlra agus ó gach earnáil tabhairt faoi Dhioplóma Gairmiúil chun scileanna fiontraíochta faoi leith a bhaint amach, faoi stiúir saineolaí aitheanta ar an ábhar, an Dr Fionnbarra Ó Brolcháin, agus líonra luachmhar a chruthú le ceannairí tionscail in Éirinn agus go hidirnáisiúnta. Níl aon dabht ach gur buntáiste é an cúrsa seo a reáchtáil trí mheán na Gaeilge, rud a chruthóidh nasc níos láidre idir na mic léinn agus an fhoireann acadúil agus a chuirfidh go suntasach le téama an dúchais a phléifear go minic le linn an chúrsa”.

Reáchtálfar an cúrsa go hiomlán ar líne agus cuirfear tús leis an tseachtain dar tús an 26 Meán Fómhair.